Aðalfundur Markaðsstofu Suðurlands og Sproti ársins
Ársfundur Markaðsstofu Suðurlands fór fram fimmtudaginn 4. maí s.l.
Katrín Ó. Sigurðardóttir formaður stjórnar opnaði fundinn og Ragnhildur Sveinbjarnardóttir framkvæmdastjóri MSS fór yfir verkefni sl. árs og helstu áherslur 2023. Vala Hauksdóttir verkefnastjóri Markaðsstofunnar kynnti Eldfjallaleiðina og þá vinnu sem átt hefur sér stað síðustu misseri. Þá kynnti Katrín ársreikning ársins 2022. Tveir fulltrúar Ferðamálasamtaka Suðurlands eru kjörnir á aðalfundi MSS. Einungis bárust framboð frá sitjandi fulltrúum og þeir því sjálfkjörnir. Í kjölfar aðalfundar óskaði Grétar Ingi Erlendsson sem setið hefur í stjórn Markaðsstofunnar eftir lausn frá stjórnarsetu og mun varafulltrúi SASS Ása Valdís Árnadóttir taka sæti hans. Árni Eiríksson kemur einnig nýr inn sem varamaður í stað Friðriks Sigurbjörnssonar fyrir hönd SASS.
Stjórn Markaðsstofu Suðurlands:
Aðalmenn
Ágúst Elvarsson – Ferðamálafélag Austur Skaftafellssýslu
Ásgerður Kristín Gylfadóttir – Samtök sunnlenskra sveitarfélaga
Grétar Ingi Erlendsson - Samtök sunnlenskra sveitarfélaga
Katrín Ó. Sigurðardóttir - Visit South Iceland ehf
Geir Gígja – Ferðamálasamtök Suðurlands
Guðmundur Fannar Vigfússon - Ferðamálasamtök Suðurlands
Varamenn
Ása Valdís Árnadóttir - Samtök sunnlenskra sveitarfélaga
Engilbert Olgeirsson - Visit South Iceland ehf
Dóróthea Ármann – Ferðamálasamtök Suðurlands
Árni Eiríksson - Samtök sunnlenskra sveitarfélaga
Erla Þórdís Trautadóttir – Ferðamálasamtök Suðurlands
Íris Heiður Jóhannsdóttir – Ferðamálafélag Austur Skaftafellssýslu
Að aðalfundastörfum loknum hlaut Mr. Iceland viðkenningu sem Sproti ársins 2022. Á bakvið Mr. Iceland er ferðaþjónustubóndinn og hvítlauksræktandinn Hörður Bender en í umsögn Markaðsstofunnar segir:
Í miðri sviðsmynd Njáls Sögu eru Efri – Úlfsstaðir. Þar tekur Mr. Iceland á móti ferðafólki sem klæðist skykkjum og verður strax hluti af sögunni. Riðið er á slóðir Gunnars og Njáls þar sem náttúran og íslenski hesturinn fá að njóta sín til fulls. Mr. Iceland er sannkallaður frumkvöðull í ferðaþjónustu á Suðurlandi þar sem hann nýtir listisemir nærumhverfisins. Sagan, menningin, náttúran, maturinn og hestarnir.
Mr. Iceland stendur fyrir gæða upplifunar- og menningar ferðaþjónustu þar sem hann og náttúran eru í forgrunni. Ferðafólk fær að líka að kynnast manninum á bak við nafnið og sitja til borðs með honum þar sem hann eldar dýrindis mat beint frá býli. Mr. Iceland hefur nýtt sér kraft samfélagsmiðla, áhrifavalda og blaðmanna frá stofnun og hefur tekið á móti þessu fólki með bros á vör sem hefur skilað sér í umfjöllun í stórum miðlum um heim allann. Svo sem í portúgalska ríkissjónvarpinu og Vanity fair.
Markaðsstofa Suðurlands óskar Herði Bender innilega til hamingju með viðkenninguna.
Hér má nálgast upptöku af fundinum.
Eftir góðan aðalfund komu fulltrúar Íslandsstofu og fóru með gestum í gegnum starfsemi Íslandsstofu og þeirra markaðsaðgerðir ásamt því að vera með stutt námskeið í markaðssetningu á samfélagsmiðlum og sýningum.
Að því loknu var farið í örferð um Rangárþing ytra undir stjórn Eiríks Vilhelms Sigurðarsonar markaðs- og kynningarfulltrúa Rangárþings ytra. Fékk fundarfólk tækifæri til að skoða og kynnast starfsemi Fjárhúsloftsins á Lækjarbotnum , smáspunaverksmiðjunni Uppspuna, Flóka viskís, Caves of Hella og Landhótels.
Starfsfólk Markaðsstofunnar vill koma þökkum til allra sem tóku þátt deginum.