Réttir setja svip sinn á sveitir landsins
Tími íslenskra rétta genginn í garð
Í september fara réttir fram um allt land, þar sem kindum er smalað saman og þær færðar í fjárhús fyrir veturinn. Fjölskyldur, vinir og gestir hjálpast að og oft verður mikið fjör þegar kemur að því að ná kindunum og setja þær í sinn dilk í réttinni.
Réttirnar hefjast með göngum
Á sumrin eru íslenskar kindur frjálsar í haga en þegar haustar er þeim smalað saman í réttir og þeim komið í hús til að vernda þær fyrir vetrarhörkum. Réttirnar hefjast með göngum, þar sem hópur fólks leitar kindanna á beitarsvæðum á tveimur jafnfljótum, á hestbaki og fjórhjólum . Þetta ferli getur tekið nokkra daga. Jafnvel þótt veðrið sé ekki alltaf upp á sitt besta, gerir samheldnin og útiveran það að verkum að upplifunin verður oft ógleymanleg. Önnur smalamennska fer fram nokkrum vikum síðar til að ná í kindur sem hafa villst lengra af svæðinu eða sloppið í fyrstu göngum. Réttirnar sjálfar eru yfirleitt hringlaga og hólfaskiptar. Í miðju þeirra er stórt rými sem fénu er hleypt inn í sem kallast almenningur og út frá honum liggja dilkar fyrir hvern bæ sem kindurnar flokkast í.
Einstök innsýn í íslenskt sveitalíf
Réttirnar eru opnar öllum og það gefur einstaka innsýn í íslenskt sveitalíf að fylgjast með álengdar eða jafnvel taka þátt með leyfi bændanna.
Gott er að hafa varann á
Gott er að vera á varðbergi gagnvart kindum á vegum, smölum og ferðafólki sem freistast til að stoppa í vegkanti til að taka myndir á þessum tíma.
Réttir á Suðurlandi 2024:
- Fossrétt á Síðu, föstudagur 6. og föstudagur 10. september
- Skaftárrétt, laugardagur 7. september
- Haldréttir í Holtamannaafrétti, sunnudagur 8. september
- Þóristunguréttir í Holtamannaafrétti, sunnudagur 8. september
- Fjallrétt við Þórólfsfell, mánudagur 9. september
- Hrunaréttir í Hrunamannahreppi, föstudagur 13. september
- Skaftholtsréttir í Gnúpverjahreppi, föstudagur 13. september
- Tungnaréttir í Biskupstungum, laugardagur 14. september
- Reykjaréttir á Skeiðum, laugardagur 14. september
- Heiðarbæjarrétt í Þingvallasveit, laugardagur 14. september
- Seljalandsréttir undir Eyjafjöllum, laugardagur 14. september
- Grafarrétt í Skaftártungu, laugardagur 14. september
- Brúsastaðarétt í Þingvallasveit, sunnudagur 15. september
- Fljótshlíðarrétt í Fljótshlíð, sunnudagur 15. september
- Grafningsrétt í Grafningi, mánudagur 16. september
- Landréttir við Áfangagil, fimmtudagur 19. september
- Reyðarvatnsréttir á Rangárvöllum, laugardagur 21. september
- Vestur-Landeyjaréttir við Forsæti, sunnudagur 22. september
- Ölfusrétt í Reykjadal, sunnudagur 22. september
- Austur-Landeyjaréttir hjá Grenstanga, sunnudagur 24. september
- Selvogsrétt í Selvogi, sunnudagur 26. september